Marahil ay sobrang huli na ako sa gagawin kong ito dahil hinintay ko pa ang araw ng pagtatapos ng aking mga mag-aaral sa kung saan ako naglilingkod. Pero binabati ko ang bawat isa na matagumpay na nagtapos ngayong taon.
Hindi biro ang bawat araw na iyong ipinasok sa paaralan. Hindi nagkaroon ng mga araw na magkakaparehas. Lahat ay magkaka-iba. Lahat ay may nakatakdang pagsubok at kuwento na kailangan mong pagdaanan at lampasan hanggang masabi sa sarili na, “Handa na ako sa bagong bukas.”
May sandaling masayang-masaya, may sandali ring iiyak ka na lang. Pero ano pa man ang mga naramdaman at naging reaksyon, alam kong masasabi mong pinatibay ka ng mga iyon at inihanda sa mas malalaki at mas nakapupukaw na pagsubok na tiyak natin parehas na kakayanin mo ring lampasan. Gano’n kabilib sa’yo ang iyong mga guro, propesor, at mga taong nakasaksi ng iyong paglago (ikaw dapat lalo).
Binabati kita. Bagamat nagtapos ka, sabihin sa iyong sarili na hindi ito ang wakas. Sa halip ay patuloy na banggitin sa sarili hanggang sa yakapin ang katotohanan na ito ay simula ng bagong landas na tatahakin hawak ang mga natutunan sa pagkukulay ng magandang kinabukasan.
Ngayon, itong daang nasa larawan muna ang paghandaan mong lakaran at lampasan nang maabot ang regalong pinakama-iibigan ng magulang — ang iyong diploma.
Muli, binabati kita.
The Unorthodox 