Posted in Uncategorized

Ma, Para Sa’yo

Ito ang unang mother’s day na hindi ko makakasama ang aking ina. Pero masaya.

Naalala ko pa noong iminulat ako ng mundo sa pagdiriwang ng araw ng mga dakilang nanay. Sa pamamagitan iyon ng isa sa aming mga tito. Hindi ko maalala kung saan siya galing pero Linggo ng hapon iyon nang tumuloy siya sa aming bahay. Tinanong niya kaming magkapatid, “Binati na ba ninyo ang mama ninyo?” Hindi ko naintindihan ang kanyang tanong. “Bakit kaya? Para saan?” Tanong ko sa sarili habang nagpapalipat-lipat ng tingin sa kapatid kong si Olan (Oliver) at kay mama na tanda kong nagtitiklop ng aming mga damit. Walong taong gulang lang yata ako noon at anim naman ang kapatid kong si Olan. Wala pa kaming sense of full grasp sa maraming bagay, kabilang na ang kaalaman na may isang mahalagang araw pa pala si mama bukod sa birthday niya.

Siguro’y naramdaman niyang hindi namin maintindihang magkapatid ang biglaang tanong, sinabi na lang niya na batiin namin si mama dahil mother’s day daw. “Happy mother’s day, Ma,” magkasunod naming sinabi ni Olan kay mama kasama ng tig-isang yakap at kiss na binalot ng mga tanong at hiya. Ngumiti lang siya. Baka kasi alam niyang hindi pa namin talaga naunawaan ang halaga ng araw na iyon. Pero doon nagsimula ng simpleng kasanayan sa tuwing sasapit ang araw ng mga ulirang ina na tulad niya. Isang simpleng kasanayan na paulit-ulit namin ginagawa kay mama hanggang sa lumalim ang pagkaka-unawa namin sa halaga ng araw niyang iyon.

Bati, yakap, kiss. Labingsiyam na taon na naming ginagawa iyon ni Olan para kay mama, at ngayon, nakakasama na rin ang aming bunsong kapatid na si Princess.

Labingsiyam na taon. At ni minsan, wala siyang hiniling na regalo sa amin. Well, ganun naman talaga siya. Kahit nga birthday niya, hindi siya masyadong umiimik. Parang siya pa ang nahihiyang humingi ng kahit anong simpleng bagay mula sa amin. Pero sa isa sa mga mother’s day ang nakapagpa-unawa sa akin ng kung ano talaga ang hiling at gusto ni mama na makuha mula sa amin. Isang mother’s day, kamuntik ko nang malimutan ang espesyal na araw niya. Nasa high school na ako noon at mas tutok kung hindi sa aralin, sa mga kaibigan. Halos pagabi na noong nabati, nayakap, at na-kiss ko siya. “Akala ko nakalimutan mo na,” pabulong na sambit niya habang nanggigilid ang luha.

Isa lang pala ang taon-taong hiling niya. Iyon ay ang hindi namin malimutan ang nakagawian sa mahalagang araw. Napakasimple. Hindi mahirap ibigay. Simula noon, sa tuwing mother’s day, ang unang ginagawa ko pagkagising sa umaga ay ang hanapin siya, pagkatapos ay batiin, yakapin at i-kiss. Hinding-hindi ko malilimutan na may nanay akong isinakripisyo ang maraming bagay para lang maging mabubuti at mauunlad na tao ang kanyang mga anak. Hinding-hindi ko malilimutan ang araw niya at alam kong masaya na siya doon. Swerte ko. Swerte namin.

Ito ang unang mother’s day na hindi ko makakasama ang aking ina at mabigyan ng simpleng bati, yakap, at kiss. Pero masaya dahil sa kabila ng sitwasyon, naniniwala ako na magiliw niyang iniisip na hindi ko siya nakalimutan sa araw niya. Alam na niyang may post ako sa Facebook at Instagram kahit wala siyang account ni isa sa mga iyon. Alam ko na maligaya siya para sa akin. 

Naniniwala ako na bukod sa panalangin niya gabi-gabi para sa aking kaligtasan bago siya magpahinga, palagi niya ring binabanggit sa sarili na proud siya. Proud siya sa kung anong narating ng mga anak niya. Proud siyang pinaniniwalaan na nagbunga ang sakripisyo dahil naging mabuti at maunlad ang anak niya.

Maligayang araw ng iyong kadakilaan bilang ina, Ma. Miss kita. Miss ko ang tawa mo sa mga biro ko at higit sa lahat, miss ko ang iba’t-ibang paraan mo ng pagpaparamdam ng tunay na pagmamahal sa amin. Mahal na mahal ka namin ni Olan at Princess.

Hanggang sa susunod na bati, yakap, at kiss. 😘

Advertisements

Author:

Graduate of Psychology (Bachelor's Degree) Graduate of Counseling (Master's Degree) Licensed Counselor Filipino

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s